नवलपुर । नवलपुर सुनचाँदी व्यवसायी संघको तेस्रो जिल्ला अधिवेशनअन्तर्गत उम्मेदवारहरूको मनोनयनमाथि परेको दाबी-विरोधका विषयमा निर्वाचन समितिले निर्णय गर्दै सबै उम्मेदवारको उम्मेदवारी कायम राखेको छ। समितिको निर्णयसँगै संघको नेतृत्व चयनका लागि भदौ ७ गते निर्वाचन हुने निश्चित भएको छ।
निर्वाचन समितिले आज मंगलबार जारी गरेको सूचनामा उम्मेदवारहरूको उम्मेदवारीमाथि परेको दाबी-विरोधका सम्बन्धमा संघको विधान २०७४ अध्ययन गरी आवश्यक छानबिन तथा छलफलपछि निर्णय गरिएको जनाएको छ।
यस क्रममा महासंघ तथा प्रदेशबाट खटाइएका प्रतिनिधि, संघका पदाधिकारी तथा सम्बन्धित पक्षबाट प्राप्त सुझाव र सल्लाहलाई समेत आधार बनाइएको निर्वाचन समितिका संयोजक अधिवक्ता अर्जुन प्रसाद काफ्लेको भनाइ छ।
समितिले संघमा आबद्ध व्यवसायीको हकहित, व्यवसायको व्यावसायिक भविष्य तथा संस्थागत एकतालाई प्राथमिकतामा राख्दै दाबी-विरोधको टुंगो लगाएको जनाएको छ।
उम्मेदवारी खारेज गर्दा संघभित्र थप विवाद उत्पन्न हुन सक्ने, व्यवसायीबीचको पारस्परिक सम्बन्धमा असर पर्न सक्ने तथा मतदाताले आफूले रोजेको उम्मेदवार छनोट गर्ने अधिकारबाट वञ्चित हुन सक्ने अवस्थालाई समेत ध्यानमा राखिएको समितिले स्पष्ट पारेको छ।
उम्मेदवारहरूको विगतको अनुभव, क्षमता र संघमा निर्वाह गरेको भूमिकालाई समेत मूल्यांकन गर्दै कुनै पनि उम्मेदवारलाई निर्वाचन प्रक्रियाबाट बाहिर राख्ने पर्याप्त आधार नदेखिएको निष्कर्षमा समिति पुगेको हो।
त्यसैले दाबी-विरोध परेका सबै उम्मेदवारको उम्मेदवारी कायम राखिएको निर्वाचन समितिले जनाएको छ।
समितिले निर्वाचनपछिको वातावरणलाई समेत ध्यानमा राख्दै सबै उम्मेदवार, मतदाता तथा संघका सदस्यहरूबीच आपसी सम्मान, सहकार्य र एकताको भावना कायम राख्न आग्रह गरेको छ।
निर्वाचनलाई लोकतान्त्रिक विधि र पद्धतिअनुसार स्वच्छ, स्वतन्त्र तथा निष्पक्ष रूपमा सम्पन्न गर्ने प्रतिबद्धता पनि समितिले जनाएको छ।
११ उम्मेदवारमाथि परेको थियो दाबी-विरोध
निर्वाचन समितिले सार्वजनिक गरेको विवरणअनुसार संघका विभिन्न पदमा उम्मेदवारी दिएका ११ जना उम्मेदवारविरुद्ध दाबी-विरोध परेको थियो। समितिले ती दाबी-विरोधमाथि अध्ययन तथा छलफल गरी सबै उम्मेदवारी कायम राख्ने निर्णय गरेको हो।
दाबी-विरोध परेका उम्मेदवारहरूमा उपाध्यक्ष पदका उम्मेदवारहरू हुम बहादुर सुनार, श्याम गहतराज, यमबहादुर विश्वकर्मा, महासचिव पदका उम्मेदवार मनोज रामदाम, सचिव पदका उम्मेदवारहरू महेश सि.के., लिल बहादुर वि.क., कोषाध्यक्ष पदका उम्मेदवारहरू राजेन्द्र सुनार, हिक्मत सिंह गहतराज, सहसचिव पदका उम्मेदवारहरू गोविन्द बहादुर वि.क., मनबहादुर नेपाली, सह-कोषाध्यक्ष पदका उम्मेदवार मनबहादुर वि.क.(मनोज) रहेका छन्।
निर्वाचन समितिले उम्मेदवारको मनोनयन दर्तामाथि उठेका विषयलाई प्रक्रियागत रूपमा अध्ययन गर्दै निर्वाचनमा सहभागी हुने अधिकारलाई प्राथमिकता दिएको जनाएको छ। समितिको निर्णयपछि उम्मेदवारहरूबीचको प्रतिस्पर्धा थप स्पष्ट बनेको छ।
भदौ ७ गते बिहान १० बजेदेखि मतदान
निर्वाचन समितिका अनुसार यसअघि भदौ ५ गतेका लागि तोकिएको निर्वाचन विशेष कारणवश भदौ ७ गते सारिएको हो। भदौ ७ गते बिहान १० बजेदेखि दिउँसो ४ बजेसम्म मतदान हुने कार्यतालिका सार्वजनिक गरिएको छ।
यस्तै, उम्मेदवारले आफ्नो उम्मेदवारी फिर्ता लिन चाहेमा भदौ ३ गते बुधबार साँझ ५ बजेसम्म समय निर्धारण गरिएको समितिले जनाएको छ।
निर्वाचनको मिति नजिकिएसँगै नवलपुरका सुनचाँदी व्यवसायीबीच चुनावी गतिविधि पनि तीव्र हुने देखिएको छ। संघको आगामी नेतृत्वका लागि हुने निर्वाचनलाई व्यवसायीहरूले चासोका साथ हेरेका छन्।
सुनचाँदी व्यवसायमा देखिएका चुनौती, व्यवसायीको हकहित संरक्षण, संस्थागत पारदर्शिता, व्यवसायीबीचको एकता तथा संघलाई थप प्रभावकारी बनाउने विषय आगामी नेतृत्वका लागि महत्वपूर्ण मुद्दा बन्ने देखिन्छ।
निर्वाचन समितिले भने प्रतिस्पर्धालाई व्यक्तिगत असमझदारीमा परिणत नगरी स्वस्थ र मर्यादित रूपमा निर्वाचनमा सहभागी हुन सबै उम्मेदवार तथा मतदातालाई आग्रह गरेको छ। निर्वाचनपछि पनि संघको संस्थागत एकता र व्यवसायीबीचको आपसी सम्बन्धलाई मजबुत बनाउँदै अघि बढ्नुपर्नेमा समितिले जोड दिएको छ।
दाबी-विरोधको विवाद टुंगिएसँगै अब नवलपुर सुनचाँदी व्यवसायी संघको नेतृत्व चयनका लागि चुनावी प्रतिस्पर्धाको बाटो स्पष्ट भएको छ। भदौ ७ गते हुने निर्वाचनले संघको आगामी नेतृत्वको टुंगो लगाउनेछ।
तपाईको प्रतिक्रिया
सम्बन्धित खवर
